Алматылық жігіт Нью-Йоркте қазақ радиосын ашты

0
497

Нью-Йоркте қазақ радиосы іске қосылды. Нақты айтқанда, «Freedom FM» радиосы күнделікті 2 сағатты қазақ тіліндегі жаңалық пен музыкаға арнайды, деп хабарлайды Karasayinfo.kz желілік басылымы. Бұл туралы ҚазАқпарат басылымында белгілі болды.

АҚШ-та «Qazaq time» радиосы қалай пайда болғаны туралы оның негізін қалаушы әрі радио жүргізушісі Данияр Қожан айтып берді. Жерлесіміз Данияр Қожан – Алматының тумасы. Ол қаладағы Қазақ гуманитарлық заң университетін «құқықтану» мамандығы бойынша тәмамдаған. Нью-Йоркте тұрып, жұмыс істеп жатқанына үш жылдан асқан. Онда Данияр адвокаттың PR менеджері болып қызмет етеді. Сондай-ақ, отандасымыз АҚШ-та қазақ мәдениетінің өркендеуіне үлес қосып жүр. Нью-Йорктегі «Qazaq time» радиосы санаулы күн бұрын ғана алғаш эфирге шықты. Қазақстанның осы қаладағы бас консулы Алмат Айдарбеков, «Жұлдыз ФМ» радиосындағы әріптестер және Нью-Йорктегі қазақ полицейі Димаш Ниязов оның бағдарламасына қонақ болған.

«Қазіргі заманда радионың рөлі бұрынғыдай әлі де зор. Ол тыңдармандарын жоғалтқан жоқ және қарқынды дамушы БАҚ болып отыр. Америкада қазақ радиосы эфирін таратуды қолға алдым. Сырт жерде бізге Қазақстан жетіспейді. Осы орайда қазақ радиосын ашу таңдауын жасадым. Мен қазақ халқының үнін бүкіл АҚШ-қа жеткізгім келеді. Осылайша ана тіліміздің дамуына өз үлесімді қосқым келеді», – деді Данияр Қожан.

Оның айтуынша, Нью-Йорктегі «Freedom FM» орыс тілді радиосының күнделікті 2 сағаты елімізде болып жатқан соңғы жаңалықтар мен қазақ әуендеріне арналады. Сондай-ақ, Америка төрінде ашылған алғаш қазақ радиосының шымылдығы әлемге танымал әнші, жерлесіміз Димаш Құдайбергеннің әнімен ашылған.

Тыңдармандармен керіс байланыс орнату мақсатында «Сұрақ-жауап» айдары бар. Онда радио тыңдаушылар өздерін қызықтырған сауалдарды эфир қонақтары мен жүргізушісіне жолдай алады. «Менің мақсатым – өз отанымды Америкаға таныстыру. Осында тұрып жатқан қандастарымызға Отанның дәмін сезгізу. Мен еліміздің бай тарихы туралы айтқым келеді. Бақытты балалық шағым, ұлтаралық достық және қонақжай үшін Қазақстанға алғысым шексіз. Мен ұлттық мәдениетімізді, әдет-ғұрып пен салт-дәстүрімізді АҚШ-та кеңінен насихаттауға тырысамын», – дейді радио жүргізуші Данияр.

ОСТАВЬТЕ ОТВЕТ

Пожалуйста, введите ваш комментарий!
пожалуйста, введите ваше имя здесь