Кәсіби мерекелерімен құттықтады

0
977

Ақпарат және байланыс қызметкерлерінің кәсіби мерекелеріне орай, бүгін аудандық «Заман жаршысы» газеті редакциясы ұжымы мен облыстық «Жетісу», «Огни Алатау» газеттерінің және «Жетісу», «СТВ» телеарналарының тілшілеріне құрмет көрсетілді. Аудандық әкімдіктің кіші залына жиналғандар алдымен биыл 85 жылдық мерейтойын қарсы алып отырған «Заман жаршысы» газетінің тарихы, тыныс-тіршілігі жайындағы бейнероликті тамашалады.

Аталған мереке иелерін аудан әкімінің орынбасары Айжан Назарбаева салтанатты жағдайда қабылдап, аудан әкімінің сәлемін жеткізді. Қазыналы Қарасай жерінде қолға алынып жатқан қаншама игілікті істі көрсетіп, жақсылықтың жаршысы болып жүрген журналистер қауымына ризашылығын білдірді. Мемлекеттік бағдарламаларды халық арасында насихаттап, ауданның әлеуметтік-экономикалық өркендеуіне өзіндік үлесін қосып жүргені үшін бірқатар мереке иелерін аудан әкімінің Алғыс хатымен марапаттады. Атап айтқанда, мұндай құрметке «Жетісу» телеарнасының операторы А.Жөнкешов, аудандық «Заман жаршысы» газетінің дизайнері А.Қыстықбаева мен менеджері Ғ.Балабекова лайықты деп табылды. Өзгелеріне де аудан әкімі атынан сый-сияпат ұсынылды.

Салтанатты жиын барысында аудандық қоғамдық кеңес төрағасы С.Мәсімақынов та сөз алып, халық пен билік арасындағы «алтын көпір» саналатын БАҚ саласының қызметкерлеріне жақсы тілегін жеткізді. Сонымен қатар, кәсіби мерекелерінің қарсаңында, облыстық қос басылымның ғасыр тойына орай, ҚР Ақпарат және коммуникация министрлігінің «Ақпарат саласының үздігі» төсбелгісін алған «Жетісу» және «Огни Алатау» газеттерінің Қарасай ауданы бойынша меншікті тілшілері Қ.Қайранбаев пен Т.Мұхтарова, жергілікті «Заман жаршысы» газетінің бас редакторы А.Исаева сөйлеп, журналистер қауымына көрсетілген құрмет үшін аудан басшылығына алғыстарын айтты.

ОСТАВЬТЕ ОТВЕТ

Пожалуйста, введите ваш комментарий!
пожалуйста, введите ваше имя здесь